Гародніна дня
Прадукт дня
Гароднінныя пацешкі
В’етнамская кухня
Асноўныя складнікі в’етнамскага стала
Рыс і рысавыя макароны з вялікай колькасцю гародніны ствараюць аснову в’етнамскай кухні. Рыба, морапрадукты, амаль усе ядомыя віды жывёлаў, а таксама насякомыя гарантуюць разнароднасць і багацце страваў в’етнамскай кухні.
Спосаб прыгатавання рысу
Рыс – гэта кароль в’етнамскага стала. Розныя яго гатункі вымагаюць адрозных метадаў прыгатавання. Клеістыя гатункі перад прыгатаваннем трэба намачыць і пазбавіць пылу. Гэта менавіта пыл надае зерню клеістасць. Некаторыя з гэтых гатункаў пакідаюць у вадзе нават на цэлую ноч. Перад прыгатаваннем рыс заліваюць вадой і прыкрываюць. Гатуецца найперш на моцным агні, паступова змяншаючы яго, дзякуючы чаму рыс дасягае аптымальнай вільготнасці і сыпучасці. Не трэба баяцца, калі рыс трохі прыгарыць, некаторыя думаюць, што менавіта прыпалены рыс – найсмачнейшы!
Вялікая разнароднасць страваў з гародніны тлумачыцца і культурнай традыцыяй, моцна звязанай з буддызмам, які вызначае не толькі спосаб жыцця в’етнамцаў, але і тое, што яны ядуць.
Шырокае прымяненне свежай гародніны – гэта адзін з аспектаў, які адрознівае в’етнамскую кухню ад кітайскай. Сырую гародніну і зёлкі дадаюць не толькі для смаку, але і для аздараўлення. Гародніна – абавязковы дадатак для кожнай стравы. Яе падаюць як гарнір, як асобную страву і ў выглядзе салатаў.
Гароднінныя пікулі па-в’етнамску
В’етнамцы любяць і кансерваваную гародніну. Адным з самых папулярных спосабаў кансервавання з’яўляецца марынаванне. Марынад гатуюць з рысавага воцату з дадаткам солі і цукру. Яшчэ в’етнамцы вельмі любяць квашанне. Квасяць розную гародніну – капусту, моркву, квяцістую капусту, цыбулю, нават дыні і кавуны.
Рыба і прадукты мора
Доступ да мора паклаў моцны адбітак на в’етнамскую кухню. У прыморскіх раёнах, апрача рысу, вельмі важным складнікам рацыёну з’яўляюцца рыба і морапрадукты. Рыбалоўства – галоўная крыніца прыбытку для мясцовых жыхароў, таму нікога не дзівіць вялізная колькасць кірмашоў. В’етнамцы звычайна прадаюць марскіх абітальнікаў яшчэ жывымі, бо тут пануе гарачы клімат, а халадзільнікаў хутчэй няма. І гэта тычыцца не толькі кірмашоў. Мы можам прыйсці ў рэстарацыю і выбраць проста з акварыуму штосьці сабе на абед, што потым і прыгатуюць. Такая свежасць страваў і нізкія кошты прыцягваюць турыстаў, бо стравы, якія ў Еўропе лічацца шыкоўнымі і каштуюць шалёных грошай, у В’етнаме даступныя для кожнага.
Натуральныя і здаровыя слодычы
Самым папулярным дэсертам на в’етнамскім стале з’яўляецца садавіна. Яе мноства. Апрача вядомых гатункаў, тут ёсць садавіна, якая нам падасца казачнай. Лічы, пітайя, ананасы, памела, манга, авакада, рамбутан – толькі частка з вялікага асартыменту садавіны, якую мы можам набыць у мясцовых гандляроў. Смачным дадаткам да шмат якой гародніны в’етнамцы лічаць соль і чылі.
Вок
Посуд, які здабыў славу не толькі ў Азіі – вок. Гэта від патэльні, якой жыхары В’етнаму часта карыстаюцца для прыгатавання сваіх традыцыйных страваў. Вок мае паглыбленае, паўкруглае дно, дзякуючы якому хутка награецца, а складнікі смажацца бліскавічна. Падчас прыгатавання страваў у воку варта памятаць пра частае, нават пастаяннае памешванне, каб ежа не прыгарэла. Дзякуючы арыгінальнай форме, пры смажцы ў воку не патрабуецца вялікай колькасці алею, аднак трэба часта мяшаць, перакладваючы менш падсмажаныя часткі на берагі патэльні. Вок можа служыць і для тушэння прыправаў. Адно што трэба прыкрыць яго спецыяльнай накрыўкай купалападобнай формы, каб страва была мяккая. Вок палюбяць і тыя, хто дбае пра фігуру, бо форма патэльні дазваляе прыбраць са стравы лішні тлушч.
Рэцэпт дня
Топ 5 рэцэптаў
